قصة شركات توظيف الاموال علي الفيس بوك

عادت الي الأضواء قصة شركات توظيف الاموال وتداول رواد موقع التواصل الأجتماعي فيس بوك بوست يروي قصتها من وجهة نظر كاتب البوست الذي قال فية

بعد ما احمد توفيق عبد الفتاح الشهير باحمد الريان سنة 80
حصل فى مصر ازمة اقتصادية عانت مصر منها انخفضت سعر الفايدة فى البنوك والدهب غلى وسوق العقارات كان مشلول
بس المشكلة بقى ان تحويلات العاملين فى الخارج ده كان مصدر من دخل اى دولة احمد الريان كوش على حاجة تخص الدولة وهى تجارة العملة وتحويلات المصريين فى الخارج تجارة العملة مشيت مع احمد الريان واخواته زي السكينة فى الحلاوة لدرجة انهم وصلوا انهم كانو بيغيروا مليون دولار فى اليوم هوب شوية ودخلوا على توظيف الاموال والدنيا مشيت على الاخر تخيل انهم كانو بيدوا فايدة 50% انت متخيل تحط 100جنية تاخدها 150 المصريين طمعوا واللى معاه فلوس فى البنك سحبها لان البنك كان بيدى 10%بس الريان بقى اقوى من الدولة نفسها واقتصاد الدولة وقع وقتها وانتشرت فكرة توظيف الاموال اللى مكنوش بس شركات الريان لا دول كانوا 106شركة منهم شركات اشرف السعد والشريف والهدى بتاعة هدى عبد المنعم اللى هى المراة الحديدية وفى عام 1986 الدولة كانت مزنوقة فى شحنة ذرة وعلف وكانت الدولة عندها عجز فى العملة الاجنبية راحت الحكومة لاحمد الريان طلبت منه انه يشتريلها صفقة ذرة ب 50مليون دولار وقالوله بس احنا هنحاسبك بالمصري احمد الريان متاخرش وقال عينى للحكومة ولبلدى وفعلا اخونا احمد الريان قعد 10شهور يطالب وزارة الزراعة بالفلوس والحكومة قال امك فى العش ولا طارت هو اللى عند الحكومة بيرجع

نجوم في شركات توظيف الاموال والاهوال
متخيل ان الشركات دى كان مين شغال فيها سامى مبارك اخو حسنى مبارك كان شغال مع اشرف السعد نائب رئيس مجلس الادارة وكان مشغل ابن صفوت الشريف طيب انت عارف مين المستشار الاعلامى لشركة السعد كان الكاتب الكبير انيس منصور

متخيل انت السعد والريان كيانين كبار جدا فى الدولة دولة ايه دول دولة جوة الدولة
سنة 88 حصل اندماج بين شركات السعد وشركات الريان مشاريع بالهبل استصلاح اراضي صندوق لتحريك المشاريع الوطنية المتعسرة باختصار اشتغلوا مكان الدولة وهيدوا شقق للشباب بالتقسيط الدولة قلقت وبعتت تحذر انهم يفكوا الاندماج والشراكة بس اشرف واحمد الريان مسمعوش الدولة تسكت لا عملولهم قانون

قانون مخصوص

مخصوص قانون 46 لسنة 88 والقانون ده بيمنعهم انهم يشتغلوا شغل البنوك ولا ياخدوا فلوس من الناس وبدات الدولة تطلع عليهم اشاعات انهم بيصفوا وانهم هربوا برة البلد فى الوقت ده اغلب الناس اترعبت وراحت تجري تسحب فلوسهم الريان قال مفيش فلوس سايله دى كلها مشاريع والدولة تدخلت عشان تنفذ الخطة اللى عملتها قالت للريان يعنى انت مش هتدفع فلوس الناس يبقى هنتحفظ على الاصول واحنا نسدد للناس الريان قال طيب ادونى فرصة قالت الحكومة مفيش فرصة طيب سفرونى امريكا عشان ابيع ارض هناك تمنها 250الف دولار الدولة رفضت طيب انا عندى فلوس فى سويسرا ابدا والدولة ابتدت تسدد للناس فلوسها بس بطريقتها يعنى انت لو حاطت فلوس مش بالضرورة تاخدهم كلهم لانها اصول وفعلا اتقبض على الريان والنيابة قالت انه هرب 3مليار ده غير الاصول اللى برة مصر طلب الريان وقتها انه يقابل الشيخ الشعراوي والشيخ عبد الصبور وقعدوا معاه 3ساعات فا الشعراوي طلب من الحكومه انهم يسيبوا الريان

فلوس أمريكا

يسافر 6شهور يجيب فلوس يشغل بيها مشاريعه العطلانه ويسدد الناس وانا هتسجن مكانه انا وعبد الصبور النيابة رفضت وطلع زكى بدر باشاعه قال فيها ان الريان عميل ل ايران وانه دفع 5 مليون لتموين الارهاب طبعا مستشار الريان فى الوقت ده كان مرتضي منصور اللى رد على زكى بدر ورفع عليه قضية وقال له ورينا مستنداتك لو عندك دليل راحت الحكومه معتقلة مرتضي منصور 90 يوم وطبعا فرصة الريان من غير دماغ مستشاره راح زكى بدر للريان قال له عايز توفق اوضاعك مشي مرتضي وهاتلى اوراق مضروبةمن امريكا ان فلوسك هناك اخونا احمد الريان قال اهى قشاية نتعلق فيها ووافق فورا راحوا ملبسينه قضية جديدة قضية تزوير الريان اتقبض عليه واتحكم عليه ب 15 سنه سجن سنه 88 وكان المفروض يخرج سنة 2003 بس خرج سنة 2010 فضل محبوس 7سنين زيادة لان حبيب العدلى كان رافض خروجه بموجب قانون الطوارئ
قال انه خطر على الامن العام الريان بقى بعد الثورة قال ان حبيب العدلى طلب منه رشوة 10مليون جنية عشان يخرجه من السجن بس الريان مكنش معاه المبلغ ده ده لما خرج الريان كان عليه غرامه 922الف جنية ولازم يدفعها رجال الاعمال دفع طلعت مصطفى ودفع العزبي بتاع الصيدليات وخرج الريان وتوفى فى 2013 بالمناسبة الاتوبيس اللى تحت ده الريان هو اللى دخله مصر عشان يعمل مواصلات خاصة تنقل المواطنين زي هيئة النقل بنفس سعر تذكرة الهيئة ولما حصل اللى حصل الحكومة اخدت الاتوبسلت ليها وشغلتها
ملحوظة مهمة جدا انا نسيت اكتبها فى البوست الحكومة المصرية كانت عايز قرض من البنك الدولى .البنك الدولى قال للحكومة المصرية عشان اديكم القرض خلوا شركات الريان تضمنكم
اه والله ده اللى حصل والحكومه منسيتش الحكاية وده كان سبب الخراب