ادعت تعدي والدها عليها..ننشر أقوال المتهم بقتل شقيقته بالصف
![متهم](https://media.hwadith.com/img/24/06/05/43840.jpg)
تفاصيل مثيرة كشفتها أقوال المتهم بقتل شقيقته خنقًا حتي الموت، بسبب شكه في سلوكها بالصف، التي حصلت فيتو علي نسخة منها، وذلك على خلفية التحقيقات في القضية رقم 4761 لسنة 2024 جنايات الصف.
أقوال المتهم بقتل شقيقته بالجيزة
أدلي المتهم باعترافات تفصيلية أمام جهات التحقيق، حيث قال: “أنا الأخ الكبير على ثلاث بنات ومعايا أخ صغير تانى لسه متجوز، وحصل مشاكل بين ابويا وامي بسبب اختى فرح رمضان حسين على، عشان ادعت على ابوها انه اتهجم عليها، وده كان سبب في إن أمي تطلب الطلاق من ابويا واطلقت ورفعت قضايا على أبويا”.
اضاف المتهم أمام جهات التحقيق: “اختي فرح مواليد ۲۰۰٤ وانا وهيا اتجوزنا في يوم واحد ١٤-٨-٢٠١٩م وهيا راحت قعدت في قرية اسمها منيا الصف ومعداش 4 شهور وغضبت وجات بيت ابويا وحطت دماغها في دماغ مراتي، وجيت في يوم وهيا غضبانة وقاعدة في بيت ابويا وانا راجع من الشغل طالع شقتى فوق بيت ابويا وامي، لقيت الباب مفتوح ومراتى دعاء مش فيه ولقيت ورقة على التلفزيون مكتوب فيها انا دعاء ومشيت انا واختك فرح ومش هنرجع البيت الا لما ابوك يسب البيت عشان ابوك بيتهجم علينا احنا الاثنين”.
واستكمل إسلام المتهم بقتل شقيقته: “فضلت أسبوع ادور عليها وجبناهم وعرفنا إنهم كانوا هاربين مع واحد في اسطبل عنتر، وقاعدين أسبوع معاه في الشقة وأول مارجعتهم طلقت مراتي، وسبت اختي اطلقت هي كمان من جوزها وجالها عريس ثاني بعد عدتها على طول واتجوزت، وراحت قعدت معاه في التبين ومكملتش ست شهور وجات برضوا بيت ابوها واتخنقت مع ابويا بسببها عشان هو يساعدها انها تغضب وتسيب بيت جوزها، وسبت له البيت ومشيت انا وأمي واخواتي البنات روان عندها ٧ سنين وروضة ١٣ سنة، وروحت قعدت في الشرفا وسكنت في بيت خالي واخذته منه ايجار لأمي وإخواتي والكلام ده كان في ۲۰۲۰”.
وتابع المتهم بقتل شقيقته: “عرفت وانا سايبهم انها اطلقت من جوزها الثاني روحت اتكلمت مع ابويا تاني وقالي ملكش دعوة ده بنتى وانا حر فيها وقولتله خلاص براحتك وسيبتهم وبلغت أعمامي باللي بتعمله”.
تفاصيل إحالة المتهم للمحاكمة الجنائية
أحالت النيابة العامة المتهم "اسلام.ر" لمحكمة الجنايات المختصة بدائرة محكمة استئناف القاهرة بعد أن وجهت إليه تهمة قتل شقيقته، بسبب شكه في سلوكها حتي قام بخنقها حتي الموت في الصف، وذلك علي خلفية التحقيقات في القضية رقم 4761 لسنة 2024 جنايات الصف.