مأساة زوجة مع زوج عايش في خيال علي جروبات نشر الرزيلة علي الانترنت

السلام عليكم
انا بكتب لحضرتك استاذ محمد وانا منهاره وقلبى واجعنى وعقلى عاجز عن التفكير ومش عارفه اعمل ايه انا من بلد جنب المنصورة
وسامحونى لو هطول عليكم ملخص 8 سنين عيشتهم فى عذاب ولحد دلوقتى بعانى

زواج 8 سنوات
انا مطلقه ، كنت متزوجه من سنه بس و زواجى دام 8 سنين انجبت فيهم ولدين
طليقى فى اول سنتين زواج كان راجل محترم نوعا ما وكويس معايا كنت بحبه جدا مش طرفى كنت لما يجبلى كوبايه مايه او اى حاجه او او حتى عطانى 5 جنيه كنت ببوس ايده قدام الناس ، كل ده كان اول سنتين زواج بس وبعدها بدا يتغير معايا تدريجيا بدا يمد ايده عليا رغم انه عمره ما عملها وبدا يشتمنى باهلى

غاوي شتيمة

وتضيف الزوجة ويقصد انه يشتمنى بأبويا المتوفى ولما اقوله ليه بتشتمنى بيه وانت عارف انى بتوجع يقولى عشان تتوجعى اكتر حتى اهتامه قل بيا جدا و ده خلانى اشك انه بيكلم واحده بس لما مسكت تليفونه لانى معايا الباسورد بتاعه عشان كنت انا اللى عاملاهولى وهو عمره ما يشك انى ممكن امسك تليفونه لانه عارف انى واثقه فيه جدا لقيت انه مشترك فى جروبات تبع الرجاله والذكورين وحاجات الناس المريضه دى وكان بينزل مشاكلنا عليها وانا سكتت ومتكلمتش وقولت فترة فى حياته وهتعدى واستحملى شويه وربنا يهديه لكن مكنتش فترة فى حياته وخلاص بالعكس كل يوم بيبقى اسوء من اللى قبله بقى بيهدد دايما بانه هيروح يعدد قولته هو انا مقصره معاك فى حاجه قالى لا بس ده حقى وانا حر وعايز اشوف ستات غيرك والدنيا بتحب التجديد ، لما كنا بنتخانق كان بيقولى انزلى بوسى رجلى عشان ارضى عندك وكنت بعمل كده وكنت بقوله ده عشان انا بحبك يقولى لا ده عشان ارضى عنك واسيبك هنا فى البيت تخدمى بلقمتك وتربى عيالك وبدا يطلب منى انى اتنازله عن القايمه واعطيله الدهب ويقولى كل صحابى بعد ما بيتجوزوا بيخلوا مراتتهم يتنازلوا عن القايمه ويعطوهم الدهب قولته ده تعب وشقى ابويا الله يرحمه قعد يشتم فى ابويا ساعتها جالى انهيار عصبى واغم عليا

اهمال متعمد
بقى مهملنى جدا حتى فى العلاقه الزوجيه بقيت جماد بالنسباله ياخد غرضه منى ويرمينى بعدها ويدينى ضهره لحد ما تعبت واتكلمت معاه كتير فكان بيضحك ويقولى انتى ست تافهه وشهوانيه ولما حسيت انى ممكن احيد عن طريق ربنا وخصوصا انى كنت 26 سنه فقررت انى اطلق منه لانى مش عايزة اغضب ربنا وبالفعل طلبت منه الطلاق قالى هفكر واليوم التانى على طول لقيته منزل على جروب مشهور بتاع الرجاله انى عايزة اطلق ويعمل ايه ومن ساعتها نزل من عينى كراجل قالى انه مش هيطلق غير لما اتنازل عن كل حاجه وانا رفضت لان عفشى ابويا دفع فيه دم قلبه وكل حته فى العفش بتفكرنى بابويا قالى خلاص مش هطلقك قولته حرام عليك انت متعرفش ربنا راح ضاربنى وخنقنى وروحى كانت بتروح منى وماسبنيش من ايده غير لما حس انى بموت ، روحت عملت طلاق للضرر قبل ما اثار الضرب تروح واخدت حقوقى وعايشه عند والدتى انا و اولادى ولكن مكنش سايبنى فى حالى كان بيهدد انه هيقتلى و يقولى هكب فى وشك مايه عشان متبقيش نافعه لو مرجعتلهوش عشان يكسرلى مناخيرى اللى فى السما زى ما هو قال فروحت عملته محضر عدم تعرض وبالفعل بطل تهديداته الفارغه ولكن مشكلتى دلوقتى انى مش حارماه من ولاده ولكن كل خروجه يكره الولاد فيا ويقولهم ماما هتتجوز وهتسيبكوا وماما مش بتحبوكوا وعايزة تخلص منكوا وماما قالتلى انها هتقتلكوا بليل وتعالوا عيشوا معايا ولما عرفت من ولادى انه بيقولهم كده لانهم كانوا بيجوا مرعوبين منى ومش بيرضوا يحضنونى منعت ابوهم من انه يشوفهم بقى هو بيجى ياخدهم من المدرسه من ورايا ويكرههم فيا اكتر و يقولى زى ما اخدتهم من المدرسه هخطفهم واسافر بيهم بره ومش هتشوفيهم تانى لدرجه انى بقيت بوديهم المدرسه واستنى من 8 ص لحد 1 الظهر على الباب المدرسه واحيانا مش بوديهم وابنى الكبير بقى بيقولى انا بكرهك يا ماما ولو اتجوزتى هروح اعيش مع بابا وانا صغيرة عايزة اتجوز ومش عايزة اغضب ربنا وابنى الصغير خايف منى لدرجه كبيرة ودايما يقولى انا لو نمت هتقتلينى بليل واقعد افهمه واهديه واقوله متسمعش كلام بابا ويهدى شويه ويقوم الصبح مش عايز حتى يحضنى
انا تعبت من كتر ما بحاول اعالج عيالى نفسيا من ابوهم تعبت من كتر ما انا فى حاجه للزواج
ارجوكم انصحونى اعمل ايه انا على حافه الانتحار جديا ..