مريم تطلب الخلع من زوجها: بيضربني أثناء العلاقة الزوجية

مريم فتاة عشرينية تزوجت قبل 3 سنوات من شاب يكبرها بـ 4 سنوات إلا أنها وجدت نفسها بعد هذه الفترة أمام محكمة الأسرة في مصر الجديدة، تطلب الخلع من زوجها بعدما استحالت المعيشة بينهما، بسبب قيامه بالتعدي عليها بالضرب أثناء ممارسة العلاقة الزوجية معها.

مريم تطلب الخلع من زوجها والسبب مفاجأة

وسردت مريم قصتها مع زوجها وبدايتها كانت قبل 4 سنوات حيث قالت «من 5 سنين كنت بشتغل في شركة وبعد سنة اتعرفت على موظف الحسابات وبقينا أصحاب وبعدها اتقدم لي عشان يتجوزني، وفعلا أسرتي وافقت على ده واتخطبت له وبعدها بـ 8 شهور بس اتجوزنا، ومكنش في أي مشاكل في الجواز ولا حاجة في أول شهر».

تابعت مريم قائلة «في بداية الجواز كان شخص طبيعي وبيتعامل بكل ذوق وبناخد على بعض يمكن كان جريء شوية عني لكن محصلش بيني وبينه أي مشاكل، لكن بعد فترة بدأت تحصل حاجات غريبة ومش مفهومة، كان بيضربني أثناء العلاقة الزوجية ويطلب حاجات مش مألوفة وأنا من جوايا كنت متأكدة أن ده مش طبيعي بس طبعا كنت لسه عروسة جديدة ومكنش ينفع احكي لأي حد».

أكملت مريم في قصتها قائلة «لكن بعد فترة بدأت أدور على النت واشوف اللي بيعمله جوزي ده عادي ولا لأ، وعرفت بعدها أن في حاجات ممكن تجيب المرض وأنه كمان كده عنده مرض وهوس بالحاجات دي، وأنه مش شخص طبيعي وأتكلمت معاه بكل صراحة وقولت له أني دورت وعرفت ورفضت أني أعمل ده تاني وفي اليوم ده مارس معايا العلاقة غصب عني».

واختتمت مريم قائلة «تاني يوم خدت بعضي وروحت عند أهلي وهو كلمني قولت له أنا عند أهلي تعالى اتكلم معاهم لكن هو مجاش وطلبت منه الطلاق لكنه رفض فمكنش قدامي غير أني أروح محكمة الأسرة وأطلب الخلع منه عشان أخلص من اللي بيعمله وخصوصا أنه شايف أن مفيش أي حاجة تستدعي اللي أنا عملته أو اني اسيب البيت بالشكل ده وأن اللي كان بيحصل حاجة عادية بين أي اتنين متجوزين».