شد هدومي ومسك جسمي وهددني بالقتل.. ننشر أقوال فتاة التجمع ضحية سائق أوبر في التحقيقات
حصل موقع حوادث اليوم علي نص التحقيقات في قضية فتاة التجمع ، والمدعوة نبيلة عواد، ضحية سائق أوبر المتهم باختطافها، والتعدي الجنسي عليها، وتهديدها بالقتل، وإصابتها في يدها بأداة حادة خلال شهر مايو الماضي.
نص تحقيقات فتاة التجمع ضحية سائق أوبر
واستمع رجال التحقيق إلى أقوال فتاة التجمع ضحية سائق أوبر وجاءت شهادتها كالآتي:
اللي حصل إني كنت عند أختي سعاد وشهرتها سالي ، في البيت عندها في التجمع الخامس في الكامبوند بتاعها، وكنت رايحة فرح بالشيخ زايد في أكتوبر، وأنا مكنش معايا فلوس كاش علشان أطلب أوبر من الحساب الشخصي بتاعي على برنامج uber، فخليت أختي تطلب من الحساب الشخصي بتاعها على برنامج uber، وبعدين تواصل معاها شخص اللي هو المفروض هيجي ياخدني وقعدوا يتكلموا مع بعض شات على البرنامج بتاع uber.
وأضافت فتاة التجمع في اعترافاتها: بعدين بعت رقم كان الساعة 09:49 مساء وبعدين كلمنا الرقم لقيت واحدة ست هي اللي ردت، فقولتلها إحنا متأسفين إحنا كنا بنكلم uber وقفلت، وبعدها جت رسالة لقد وصلت:، أنا نزلت وركبت العربية الهيونداي اللي كانت واقفة ومشيت، وبعد مطلع من الكامبوند ركن قدام البوابة بشوية ونزل على أساس إنه بيجيب الرخصة بتاعته من الأمن على البوابة.
وأكملت: بعد كده مشينا ولقيته بيقولي ممكن تلغي الرحلة من على البرنامج وتحولي الفلوس على المحفظة، فأنا رديت عليه إنها الرحلة من حساب أختي مش من حسابي، فأنا مقدرش ألغيها، وبعدين أنا كلمت أختي علشان آخد رأيها لأن حسيت إنه هو مريض ، لأنه كان مركب سماعة في ودانه لأنه تقريبًا سمعه ضعيف، وقعدت أتكلم مع أختي بالإنجليزية وقالتلي لا لأن ده خطر، وأنتي لو لغيتي الرحلة مش هتبقي في أمان ومش هتبقى عارفه خط السير بتاع الرحلة.
وتابعت ضحية سائق أوبر: بعدين أنا قولتلوا لو أنت متضايق أو في حاجة أو محتاج الفلوس كاش نزلني هنا لأن أنا مش معايا فلوس كاش، وكان بيتجاهلتي لما بكلمه وبعدين قال أنا خلاص بدأت الرحلة، وبعد كده مشي في الطريق، وأنا معرفش الطرق فلقيته ركن العربية على جنب الطريق، فأنا كان في وداني سماعات التليفون المحمول بسمع قرآن، فلما لقيته ركن العربية فشيلت سماعة منهم أشوف في ايه، لقيته بيقولي أنا ممكن أنزل أجيب مياه من شنطة العربية علشان عطشان أشرب، فقولتلوا اتفضل.
وأردفت: نزل وفتح باب الشنطة وبعدين اتأخر شوية، فحسيت إن حاجة غربية بتحصل، فقومت لميت الشنطة بتاعتي وبفتح باب العربية علشان أنزل، وبعدين بدأت أنزل رجلي من العربية لقيته جه وماسك في إيده سلاح حاد بيقولي ده كتر ويقولي اهدي اهدي، ويزعق علشان لو مش بطلتي صويت هقتلك.
وجاء في أقوال نبيلة فتاة التجمع : أنا ساعتها قولتلوا اقتلني بس مش هتعمل معايا حاجة لأنه شد هدومي وكان عمال يمسكني، وأنا ساعتها كنت بدافع عن نفسي وماسكة بإيدي السلاح اللي في إيده وكان بإيده الثانية عمال يمسكني من جسمي، ويضربني على وشي ورأسي ويشدني من شعري، وأنا أصوت وأقوله حرام عليك أنا عندي عيال قعد يشتمني بيقولي اهدي، ولزق فيه لحد محاولت أفتح باب العربية اللي ورايا، وأزحلق نفسي بره باب العربية اللي ناحية الطريق.
وتابعت: كان في صوت عربيات بدأت تيجي فهو قام شاددني من رجلي علشان يدخلني جوة العربية، وساعتها كان علشان هو حس أن أبواب العربية اللي وراء كانوا مفتوحين، رمالي الحاجة بتاعتي برا، فأنا نزلت من العربية وطلعت أجري برة العربية، وبعدين هو ركب العربية وطلع جري، فأنا كنت ساعتها الدنيا كانت صحراء وفي ظلام.
واستكملت: بعدين لقيت عربية نقل شافتني ووقفتلي ونزل منها واحد واداني بطانية واداني مياه الشرب وقعد يقولي متخافيش، لأني كنت عماله أعيط وأصوت وأطلع أجري ناحية الشارع فهو قاللي متخافيش أنتي أمانة ومش هنسيبك، وبعدين جت عربية ملاكي ونزل منها اثنين شباب وعرضوا عليه إنهم ياخدوني على المستشفى لأني وشي وجسمي كان کله دم، ومش واضح مكانه منين بس وشافوا إيدي وهي بتنزف دم، والراجل بتاع العربية النقل مرضيش يسيبني لحد ما ياخد رقم تليفونهم.
وأضافت ضحية سائق أوبر: بعدين ركبت معاهم وطبعا كنت في حالة هستيرية وعمالة أعيط وإيدي بتنزف، وبعدين أخدوا تليفوني وهو مش عليه رقم سري فكلموا آخر رقم عليه، فكنت أنا مكلمه أختي سالي آخر رقم، وبعدين قالوا ليها اللي حصل وبعدين وقفنا عند down town في التجمع الخامس عند بنزينة إمارات مصر، وواحد نزل جاب شاش من شنطة العربية، والثاني راح البنزينة يجيب حاجات.
وأكملت ضحية سائق أوبر: بعدين أختي سالي جت وروحنا البيت وغيرت هدومي، وغسلت وشي علشان أروح قسم الشرطة أعمل محضر، وبعدين أختي قالتلي لازم أروح المستشفى الأول علشان إيدك بتنزف، ونعمل تقرير طبي بالاصابات الثانية اللي في جسمي، ورحنا المستشفى الجوي في التجمع الخامس، ولقوا إن في جرح عميق في صابعي الأيمن ومكانش في غرف بالمستشفى إني أعمل عملية هناك.
واختتمت فتاة التجمع ضحية سائق أوبر المتهم في التحقيقات: بعدين الشرطة كانت جت وعملت محضر باللي حصل ومضيت عليه، وأخدوا عليا تعهد إني أروح النيابة لو طلبوني وبعدها رحت على المركز الطبي العالمي اللي على طريق السويس عند الشروق ودخلت والدكتور كشف عليا وأنا قولتلوا أنا عاوزة أخيط إيدي وامشي فهو رد عليا الدكتور وقال طالما أنتي عليكي فترة من الوقت مش هيبقى في مشكلة لو خيطنا الجرح دلوقتي مؤقتًا ونبقى تعمل الأشعة ونشوف بعدين هنعمل ايه وفضلت في المستشفى بتاعت المركز الطبي العالمي لحد الساعة 05:00 صباحًا وبعد كدة روحت البيت عند أختي سالي اللي في التجمع وبعدين جيت النيابة النهاردة، وهو ده كل اللي حصل.
كما حصل موقع حوادث اليوم على أمر إحالة سائق أوبر المتهم بخطف فتاة التجمع ومحاولة اغتصابها، بنطاق منطقة مدينة نصر، أثناء استقلالها السيارة معه، لتوصيلها من منطقة التجمع الخامس للشيخ زايد، إلى محكمة الجنايات بتهمة الخطف وهتك العرض وإحراز أداة حادة.
وكشف أمر الإحالة أن المتهم حسین. أ. ح. ع، في يوم 11/ 5 /2024 بدائرة قسم ثان مدينة نصر بمحافظة القاهرة خطف أنثى هي المجني عليها نبيلة. إ، بالإكراه وقد اقترنت تلك الجناية بجناية أخرى أنه في ذات المكان والزمان قام بهتك عرض المجني عليها بأن أشهر في وجهها سلاح أبيض كتر، محل الاتهام التالي وأحدث إصابتها الموصوفة بالتقارير الطبية المرفقة.
