آثار حروق وضرب.. شاب يزعم تعرض أطفال دار أيتام بالهرم للتعذيب
نشر شاب يُدعى أحمد صابر على حسابه الشخصي بموقع التواصل الاجتماعي فيسبوك، منشورا أفاد من خلاله بأن هناك مجموعة من الأطفال في إحدى دور الأيتام بمحافظة الجيزة بمنطقة الهرم، تظهر على أجسادهم آثار ضرب وحروق، زاعما أن مُديرة الدار هي المُتسببة في ذلك.
شاب يزعم: دار أيتام في الهرم تترك آثار الحروق على أجساد الأطفال
وقال الشاب أحمد صابر في تصريحات خاصة لـ القاهرة 24، إنه خلال زياراته المتكررة لهذا المكان المتواجد بمحافظة الجيزة يُدعى دار الجيل المؤمن للأيتام بمنطقة الهرم، فقد شاهد بعض الأطفال على أجسادهم آثار تشبه الحروق والضرب، قائلًا: أنا روحت الدار ده أكتر من مرة، وفي كل مرة كنت بلاقي آثار حروق على أجسام الأطفال.
وأضاف: أول مرة شفت بنت محروقة في رجلها ولما سألتها قالت ده عقاب ليا، وتاني مرة لاحظنا أن الأطفال على طول ساكتين ومش بيتكلموا وبيقولوا أن صاحبة الدار كويسة بطريقة مبالغ فيها، وخلال إحدى الزيارات تكلمت مع مشرفة من المشرفات وكان عندها استعداد تتكلم عن كل السلبيات لكني روحت تاني مرة ملقتهاش ومشيت.
صاحب المنشور: الأطفال خايفة وبتكدب
واستكمل: في آخر زيارة لي لقيت آثار الحروق على أجسام الأطفال بشكل ملحوظ، ولما سألتهم قالوا لي دي لسعة قنديل، حاولت استجوبهم بـ طب أنتم رحتوا البحر امتى وازاي، لكن هم معرفوش يردوا وكان باين عليهم انهم بيكدبوا.
وقال: حاولت أصورهم لأني كنت عايز أخد أي إجراء أنقذ به الأطفال، ولما شافتني إحدى المشرفات في كاميرات المراقبة إني بصور قالت لي متصورش عشان الأطفال بتضايق، قلت لها لأ احنا بنتصور معاهم عادي، وشوية لما جت مديرة الدار خافت وتوترت وكانت عايزانا نمشي.
وتابع صابر في حديثه: مديرة الدار كانت بتتعامل مع الزائرين ومن بينهم أنا والناس اللي معايا بطريقة غير أخلاقية، وبتاخد الأكل والحلويات بتاعت الأطفال لـ نفسها وده خلاني اتعامل بطريقة مباشرة مع الأطفال عشان أضمن أن الحاجات هتوصلهم.
السوشيال ميديا مفتاح لإنقاذ الأطفال
وزعم بأنه استخدم منصة فيسبوك لمساعدة الأطفال مشيرًا إلى استخدامه أحد المجموعات لمشاركة المنشور مع رواد مواقع التواصل الاجتماعي بـ صور الأطفال، مُدعيًا تعذيب الأطفال وظهور آثار حروق على أجسادهم، وقال: وحد رد عليا من الدار في تعليق بالتهديد بـ إن مديرة الدار هتحرر محضر تشهير ضدي وبـ تأكد أن كل آثار الحروق على أجسام الأطفال دي مجرد لدغات قنديل.
واختتم: انا بحاول أعمل أي حاجة عشان أنقذ الأطفال، ولو أُثبت فعلًا تعرض الأطفال لأي ضرر أنا اللي هعمل محضر وهاخد إجراء قانوني تجاه دار الجيل المؤمن في منطقة الهرم بمحافظة الجيزة، وتجاه تهديدهم ليا بشكل مباشر خلال التعليقات.
